Freelance Algérien-C'est Quoi Le Freelance!

الفريلانس في الجزائر- ماهو الفريلانس

            هذا المقال نشاله راح نكتبوه بالدارجة لأن المدونة تاعنا موجهة للجزائريين هكذا باش كامل نفهموا، نصدمك شويا، باش تكون علابالك بلي معدل البطالة سنة 2019 وصل لــ 11,4 %، منهم 45,8 % عندهم ديبلوم ليسانس، ماستر، و أيضا   شهادات  تاع التكوين المهني و المعاهد، علاش مالا هذا النسبة مانعطوهاش فرصة باش تخدم على روحها! كيفاش؟ تبع معايا..........

المنـــــــــــاقشة

في هذا العنصر راح نتناولوا مثال باش منو ندخلوا في صلب الموضوع مباشرة، المثال 

يقـــــــــــــــــول

حمودة هو تاجر يبيع بالجملة أو يبيع بالكانتونار، يستورد مثلا السعلة تاعو من بلاد غبر الجزاير، حمودة حب يطور الخدمة تاعو و يسرع وتيرة مشروعو و يزيد يدخل الدراهم و هذا هو المفيذ، سمع بالفايسبوك و بلي ناس راها تشري و تبيع غير لتم، فقرر أنه يقرعج على هذ الشي، و بعد مدة و كي تعمروا لقرع مليح لقا بلي لازم يدخل التجارة تاعو فالعالم الإفتراضي أو العالم الرقمي و يتمرس التجارة و التسويق الإلكتروني

 eCommerce & eMarketing لي راح نفصلوا فيهم في مقالات خرى نشاله.

ويولي يبع اونلاين la vente en ligne.

المشكــــــــــــــــــل رقم 1 :

حمودة بعد ماقرر باش يدخل في هذا المجال، لقا بلي لازموا يوظف ناس باش يخدمولوا هذا التخربيط، و اصطدم بواقع أنه راح يزيد يخلق شركة جديدة بطابع جديد تسمى 

Digital Marketing Comapany و تكاليف جديدة و تكسار راس كبير بحيث أن حمودة باش يفتح فقط حساب في مواقع التواصل الإجتماعي كالفايسبوك و التويتر و اللينكداين و الأنستغرام، لازمو يوظف شخص باش يخدملوا هذا الخدمة، و أيضا باش يبهي الحالة عندو و يلونها لازمو واحد designer هو لي يحكملو جيهة graphic design و فيما يخص المتابعة تاع الحسابات مانهدروش عليها لان لازم متابعة يومية يعني لازم واحد شهار يخدملك 

المشكــــــــــــــــــل رقم 1 :

حمودة بعد مازاد سقسى قالولو بلي يا راجل مواقع التواصل الإجتماعي ماهيش كافية
لازمك تخدم براند تاعك و تنشئ موقع واب لي من خلالو ناس رايحة تكون قادرة باش تتسوق أونلاين بطريقة احترافية و تقدر تشري أيضا اونلاين و تخلصك اونلاين، و نتا تبقى عليك غير توزع هذيك السلعة لصحابها، من هنا نزيد بلي الزبون يقدر يتبع الكولي تاعو أونلاين، يعني يا سي حمودة لازمك تخلي الزبون عندك 24 ساعة.
هنا حمودة لقا روحو ملزم باش يجيب ناس لي تخدملو الموقع من الــصفر و ناس graphic conception من الــ LOGO حتى تهيئة الموقع و تطويره حتى يقدر يطلقو 
فيما يخص متابعة الموقع لازم شهار كيما قلنا الفوق.

من المشكل 1 و المشكل 2 

خمم حمودة مليح مع راسو و قرر أنو يجيـــــــــــــــــــــــب 

فريلانس - عـــــــــــــامل حر - FreeLance 

من هو الفريلانسر freelancer

هو شخص يمتلك مهارات Hard Skills أو Soft Skills ممكن نشرحوهم مبعد، نعرفوا بيهم و نذكرو الأنواع نشاله و نزيدوكم كيفاش تحطهم فالسيرة الذاتية تاعك، المهم نكملو فالموضوع تاعنا، هذ الشخص راح يستغل هذيك المهارات في عمله كفريلنسر، بحيث يلبي طلبات العملاء هو و القدرات تاعو.

هذا الشخص نقدرو نقولو يخدم عند راسو، الفكرة أن الفريلانس ماشي غير فالتجارة الإلكتروينة، بل و تمتد لمجالات خرين.

المجال هذا فالجزائر مزالو عادا جديد مقارنة بالدول الأخرى لي راها في مرحلة متقدمة منه، فالسؤال إذا يطرح سؤالو :)

- واش هي فوائد الفريلانس الجزائري Algerian freelancer

فوائد الفريلانس freelancer

- راح يوفر مناصب عمل لفئة كبيرة من الناس و الشباب خاصة 
- راح يوفر فرص تحسين الدخل المادي للشباب 
- راح يوفر فرص للشركات الجزائرية و يقلل المصاريف عليهم
- اذا قوننت الجزائر هذا المجال تسمى المعاملة رايحة تولي بالفاتورة و عليه تزيد الضريبة و دخل دراهم الدولة تاني
- راح تخلق المنافسة فالسوق بزيادة العرض يزيد الطلب
- ينمي الإقتصاد الوطني بحيث أن هذا المجال قادر يدخل العملة الصعبة للبلاد 
و الفوائد تاعو ماتكملش خلاص، كون نبقاو نعددو مانحبسوش 

و لكن يبقى الإشكال يشكل في روحو، باش نقدرو نحققو هذ الفوائد و أكثر ماشي ساهلة 

في حقيقة الأمر و رانا قلنا الجزائر جديدة فالمجال، مقارنة بالدول الأخرى، فإن الفريلانس مايقدرش يتقدم! علاش! لأن ببساطة في العديد من العراقيل و المشاكل! 

بعض المشاكل لي يعاني منها الفريلانس الجزائري    dz freelancer

خلينا نحطو فقرة صغيرة توضح ذ الشيء، مانغطوش الشمس بالغربال، العامل التكنلوجي يلعب الدور الحاسم في مثل هذا المجال، ماشي مثلا تجيبلي ميكرو مواصفات ضعيفة و تحب تخدم بيه الــ Design مثلا، و ماشي تجيب انثرنيث ضعيفة و تحب طور المجال، لأن دير حسابك بلي سرعة إستجابت الفريلانسر لطلبات العميل جد مهمة، يا تزرب يا طير الفرصة ماللخر، و تاني نفرضو أنك ديت هذيك الصفقة، علابالك بلي كون دير روطار، زعما نقولو الــــ Upload تاعك ناقص، و يجيك العميل يديرلك such bad feedback  بلي رحت فيها شريكي، و كون خير جات تحبس هنا، يا الموقع لي راك تخدم فيه راح ينحيك من التصنيف و بالتالي معظم الصفقات راح تروحلك بمعنى خاسر خاسر، باش تخرج راب رابح لازم تتوفر فيك المعايير التكنلوجية و لازم البلاد لي راك فيها توفرلك بنية تحتية و بنكية و انترنيت قوية، كي يتوفرو هذو عنا يولي الفريلانس هو العامل الحاسم 

نشكركم على قراءة المقال و نشاله نكونوا فدناكم

الدارجة لتبسيط الأمور و الفهم، و المصطلحات لي بالأحمر راح نشاله نربطوهم بمقالات أخرى نشرحوهم فيها